Гафгаз вә Азәрбајҹан
ХИН-дән Азәрбајҹан вә Иран хариҹи ишләр назирләринин ҝөрүшү илә бағлы АЧЫГЛАМА - Фото
Назир Ҹејһун Бајрамов Азәрбајҹан вә Иран дөвләтләри арасында әлагәләрин гәдим тарихә вә ортаг мәдәнијјәтә әсасландығыны гејд едиб. О, өлкәләримиз арасындакы достлуг вә әмәкдашлыг әлагәләринин јүксәк сәвијјәдә инкишаф етдијини билдириб.
Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Азәрбајҹан вә Иранын хариҹи ишләр назири Ҹејһун Бајрамовла Һүсејн Әмир Абдуллаһиан арасында ҝөрүш олуб.
Бу барәдә Азәрбајҹан Хариҹи Ишләр Назирлији мәлумат јајыб.
Билдирилиб ки, хариҹи ишләр назирләри арасында тәкбәтәк форматда башлајан ҝөрүш, даһа сонра һәр ики тәрәфдән нүмајәндә һејәтләринин иштиракы илә ҝениш тәркибдә давам едиб.
Назир Ҹејһун Бајрамов Азәрбајҹан вә Иран дөвләтләри арасында әлагәләрин гәдим тарихә вә ортаг мәдәнијјәтә әсасландығыны гејд едиб. О, өлкәләримиз арасындакы достлуг вә әмәкдашлыг әлагәләринин јүксәк сәвијјәдә инкишаф етдијини билдириб. Назир, өлкә рәсмиләри арасындакы тәмасларын, хүсусилә дә дөвләт рәһбәрләри сәвијјәсиндә ҝөрүшләрин икитәрәфли әмәкдашлығын инкишафына ҹидди тәкан вердијини сөјләјиб.
Һүсејн Әмир Абдуллаһиан Бакыда олмағындан мәмнунлуг ифадә едиб. О, Азәрбајҹан Президенти илә чох фајдалы ҝөрүшүн кечирилдијини вә һәртәрәфли мүзакирәләрин апарылдығыны сөјләјиб.
Назирләр Азәрбајҹан илә Иран арасында игтисади, тиҹарәт вә һуманитар саһәләрдә уғурла һәјата кечирилән әмәкдашлыг мүнасибәтләрини мүзакирә едибләр. Бу хүсусда Дөвләт Комиссијасынын фәалијјәти гејд едилиб.
Ҝөрүш заманы, һәмчинин бөлҝәдәки ҹари вәзијјәт, мүнагишә сонрасы јени реаллыгларын вә әмәкдашлыг имканларынын јаранмасы, о ҹүмләдән 3+3 форматында мәсләһәтләшмәләр механизминин ҝәләҹәк перспективләри, коммуникасијаларын ачылмасынын бөлҝә өлкәләринә фајдасы вә диҝәр мөвзулар әтрафында фикир мүбадиләси апарылыб.
Назирләр, һәмчинин гаршылыглы мараг доғуран диҝәр мәсәләләри мүзакирә едибләр.
Диггәт: Хәбәрдән Истифадә Етдикдә Мәнбәјә Истинад Лазымдыр!
