Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Әзиз Ислам Пејғәмбәри Һәзрәт Мәһәммәдин (сәлләллаһу әлејһи вә алиһ) мөвлуд ҝүнү илә әлагәдар олараг Иран Ислам Ингилабынын лидери Имам Хомејнинин (р.ә) тәјин етдији “Вәһдәт Һәфтә”си артыг башлајыб. Бу мүбарәк һәфтәдә дүнја мүсәлманлары вәһдәт вә һәмрәјлик нүмајиш етдирмәк үчүн силсиләвари бајрам вә мөвлуд тәдбирләри кечирирләр.
Азәрбајҹан Ислам Партијасынын (АИП) “Вәһдәт Һәфтә”си чәрчивәсиндә планлашдырдығы тәдбирләр исә сүни манеәләр сәбәбиндән ләғв едилиб.
Бу барәдә АИП функсионери Акиф Һејдәрли мәлумат вериб.
Акиф Һејдәрли билдириб ки, бу ајын 14-ү вә 15-ү Бакы шәһәриндә јерләшән “Диван” отелинин конфранс залында вә “Ҝәнҹлик” шадлыг сарајында бөјүк бајрам тәдбирләринин кечирилмәси планлашдырылмышды. Лакин илк тәдбирин башланмасына бир нечә саат галмыш ОТЕЛ рәһбәрлији зәнҝ едәрәк техники проблемләрин јарандығыны, бу сәбәбдән дә конфрансын кечирилмәсинин мүмкүн олмајаҹағыны билдириб. Ејни ссенари “Ҝәнҹлик” шадлыг сарајынын рәһбәрлији тәрәфиндән дә тәкрарланыб. Бу дәфә исә тәдбирин ләғв едилмәсинә бәһанә кими шадлыг евинин коммунал борҹларынын олмасы вә ишығын кәсилмәси ҝөстәрилиб.
Акиф Һејдәрлинин сөзләринә ҝөрә, АИП әмәкдашлары тәдбирин кечириләҹәји мәканлара баш чәкәрәк, ҝәтирилән бәһанәләрин доғру олмадығыны өјрәнибләр:
“Дүшүнүрүк ки, бу тәдбирләрин кечирилмәсинә мане олан гүввәләр вар. Азәрбајҹана сионист Исраил режиминин баш назири Бенјамин Нетанјаһунун ҝәлиши илә мүтләг Ислама вә мүсәлманлара гаршы фитнә-фасадын төрәдиләҹәји ҝөзләнилән иди. Һәттә Нетанјаһунун сәфәринин мәгсәдинин сон ҝүнләрәдәк Исраил кәшфијјат органлары тәрәфиндән ҝизли сахланмасы, бу ҝәлишин мәрамында шүбһәләрин олдуғуну ҝөстәрирди. АИП, Азәрбајҹан халгынын ирадәсини ифадә едәрәк, бу сәфәрә етиразыны пикет кечирмәклә билдирди. Лакин ишғалчы режимин баш назиринин сәфәри һәр һансыса формада өз негатив тәсирини ҝөстәрмәли иди. Бу ҝөзләнти баш верди вә АИП-ин тәдбирләри сүни манеәләрлә гадаған едилди. Лакин Аллаһ өз динини горујур вә Исламын јер үзүндә јајылмасы давам едир”.
Диггәт: Хәбәрдән истифадә етдикдә мәнбәјә истинад лазымдыр
