Әһли Бејт (әлејһимус сәлам) Бејнәлхалг Хәбәр Аҝентлији – АБНА: Чох ҝөзләмәјә ҝәрәк галмады: АГЕМ тәдбириндә Түркијә хариҹи ишләр назири Һакан Фиданын рәсми Бакынын ән “әзиз гонағы” сајылан Исраил президенти Һерсог үчүн тәшкил етдији “сүрприз” вә ардынҹа да һакимијјәт медиасынын артыг бирбаша Түркијә кәшфијјатыны һәдәфә алан материаллар јајыб сонра да силмәси, Вәтән Савашында бизә мисилсиз дәстәк вермиш Әрдоған вә АКП һөкумәти әлејһинә чыхышларын давамлы тәшвиги вә бүтүн бунларын фонунда исә президент Әрдоғанын бу ҝүн Мүстәгиллик Ҝүнү мүнасибәтијлә Азәрбајҹан халгына үнванладығы тәбрик ҹәмијјәтимизин ҹаваб ахтардығы “Мәктәбләрдәки һиҹаб гадағасына нә еһтијаҹ варды?” суалына да гисмән ајдынлыг ҝәтирир.
Артыг о дүшүнҹә јараныр ки, “һиҹаб гадағасы” Азәрбајҹан һакимијјәтинин бундан сонра һәм Түркијә, һәм дә Иранла мәсафәли давранмасы, Исраил, Русија вә Чинлә мүнасибәтләрини јахшылашдырмасы, ејни заманда, өзүнү диҝәрләријлә мүгајисәдә даһа секулјар мүсәлман идарәедиҹи гисминдә ҝөстәриб Гәрблә позулмуш әлагәләри дә бәрпа етмәси мәгсәдијлә тәшкил едилән чох рискли бир сијаси әмәлијјатдыр.
Бунун белә олуб-олмадығынын дәгиг ишартылары исә, чох ҝүман ки, октјабрын 29-30-да Анкарада кечириләҹәк Түрк Дөвләтләри Тәшкилатынын (ТДТ) 13-ҹү Зирвә топлантысында даһа ајдын ҝөрүнәҹәк.
Чүнки “Түрк әсри: дилдә, фикирдә, ишдә бирлик” шүары алтында кечирилмәси планлашдырылан бу тәдбирдә һәм тәшкилата үзв өлкәләр арасында даһа дәрин интеграсијајаја имкан верән лајиһәләрин мүзакирәјә чыхарылмасы ҝөзләнилир, һәм дә Азәрбајҹан ТДТ-јә сәдрлији Түркијәјә тәһвил вермәлидир.
15 октјабрда Бакыдакы тәдбирдә ТДТ-јә үзв өлкәләрин тәмсилчиләринин Һакан Фиданла ортаг һәрәкәт етмәмәси Исраилә мүнасибәтдә тәшкилатдакы ҹидди фикир ајрылығыны нөвбәти дәфә үзә чыхармагла, Түркијәнин ҝәләҹәкдә Русија вә ја Чинлә бағлы сијасәтиндә дә бу өлкәләрә һәлә ҝүвәнә билмәјәҹәји ҝерчәјини ортаја гојур.
ТДТ-нин агибәти исә Азәрбајҹандан, онун Түркијә илә мүнасибәтләринин ҝәләҹәк характериндән, истигамәтләриндән чох асылыдыр!
Демәли, президент Илһам Әлијевин президент Әрдоғанла ҝөрүшү артыг сијаси зәрурәтә чеврилиб вә бу ҝөрүш нечә вахтдыр медиа үзәриндән апарылан информасија савашына неҹә јекун вурулаҹағына, Түркијә вә Азәрбајҹанын бундан сонра јанашы аддымлајыб-аддымламајаҹағына, ТДТ-дә неҹә һәрәкәт едәҹәкләринә вә һәтта ТДТ үзвләринин Ислам дүнјасынын јени өзүнүмүдафиә бирлији кими гурулмасы планлашдырлан “Мәккә Иттифагы”нда тәмсил олунуб-олунмајаҹагларына да ајдынлыг ҝәтирәҹәк.
О факта да мүтләг диггәт чәкмәк ҝәрәкдир ки, октјабрын 15-дә Бакыда кечирилән тәдбирә гатылмајан Түркијә президенти Әрдоған да ТДТ-дә чох өнәмли јер тутан Өзбәкистанын тәмсилчисини - президентин гызы вә ҝәләҹәк сијаси вариси Сәидә Мирзијојеваны Анкарада гәбул едирди...
Беләликлә, инди ән мүһүмү гаршыдакы 10 ҝүн ичәрисиндә баш верәҹәк һадисәләр вә бу һадисәләрин 29-30 октјабрда Анкарада кечириләҹәк ТДТ зирвәсиндәки Әрдоған-Әлијев ҝөрүшүнү позуб-позмајаҹағы рискидир.
Һәм Түркијәдә, һәм дә Азәрбајҹанда бу өлкәләрин јахынлашмасыны истәмәјән “үчүнҹү тәрәф”ләрин әлијлә елә вәзијјәт јарадыла, елә информасијалар, компроматлар дөвријјәјә бурахыла биләр ки, мүнасибәтләр ҝетдикҹә даһа да ҝәрҝинләшәр вә сон илләр чыхышларында емосионал, сәрт риторикаја үстүнлүк верән президент Әлијев Түркијәјә ҝетмәкдән имтина да едә биләр!
Нәзәрә алсаг ки, Азәрбајҹан вә Түркијә мүнасибәтләринин ҝәрҝинләшмәсиндә әсас катализатор кими чыхыш едән Исраилдә октјабрын 27-дә ҝәләҹәк һөкумәтин агибәтини мүәјјәнләшдирәҹәк сечкиләр олаҹаг вә Гәзза гатили Нетанјаһу да бу сечкидә галиб ҝәлмәк үчүн һәр ҹүр һијләјә, фитнәкарлыға, һәтта Ирана гаршы һәрби әмәлијјатларын бәрпасына да әл ата биләр, демәли, гаршыдакы 10 ҝүн әрзиндә ән актив әмәлијјат мејданчаларындан бири јенә мәһз Азәрбајҹан олаҹаг!
Ән писи дә одур ки, һиҹаб гадағасы гәрары вә бу гадағанын да инадкарлыгла иҹрасына чалышылмасы илә чохсајлы проблемләрин мөвҹуд олдуғу өлкәмиздә сабитлијә, тәһлүкәсизлијә вә иҹтимаи асајишә ҹавабдеһ гурумларын онсуз да ағыр олан иш јүкү хејли артырылыб, әмәлијјат шәраити һәдсиз мүрәккәбләшдирилиб.
Неҹә дејәрләр, бүтүн диггәтләр мәһарәтлә тамам фәргли бир истигамәтә, үнванлара јөнләндирилиб вә әсас дүшмән кими дә “исламчылар”, “һиҹаблылар” ҝөстәрилир!
Диҝәр өлкәләрин чох да узаг олмајан тарихи тәҹрүбәси ҝөстәрир ки, белә ситуасијаларда “һөкумәт-исламчы” гаршыдурмасы һәмишә әсас әмәлијјаты тәшкил едән өлкә үчүн ваҹиб өртүк, чәтир ролуну ојнајыр.
Чох тәәссүф ки, өлкә үчүн һәдсиз рискли бир шәраитдә һакимијјәтин башы ејш-ишрәтдән, ички мәҹлисләриндән ајылмајан һарын вә әхлагсыз тәблиғат шәбәкәси дајанмадан һәм бу ҝәрҝинлији даһа да аловландырмаг вә информасија чирклилијини артырмаг хәтти сечиб, һәм дә Түркијә илә мүнасибәтләри “компромат савашы” һәддинәдәк ҝәтирмәјә ҹәһд ҝөстәрир!
Анламаг истәмирләр ки, нанкор хисләтләринә ујғун олараг апардыглары бу тәблиғат ҝерчәк дүшмәнләримизин әлинә ојнамагла, һәр тәрәфлә көрпүләри јандырмаға, һакимијјәтин һәм дахилдән, һәм хариҹдән дајагларынын гопмасына, тәкләнмәсинә, өзүнүтәҹридә ҝәтириб чыхараҹаг вә сонда да өлкәни гаршысыалынмаз хаоса салаҹаг!
Дөнүн, бир өзүнүзә бахын, мүнасибәтләри ҝәрҝинләшдирмәјин, әјләшдијиниз будағы да балталамајын! Јохса јыхылан вә о будағын алтында хынҹым-хынҹым әзилән дә елә өзүнүз олаҹагсыныз!
Sizin rəyiniz