Әһлибејт (ә) Хәбәр Аҝентлији-Бир әлиндә дәсмал ҝүнүн алтында саатларла отурмагдан алнындан сүзүлән тәри говалајыр, о бири әли илә дә гаршысындан кечиб ҝедән инсанларын вердикләри гәпикләри овҹуна алыр. О, 1993-ҹү илдә шәһид олан Меһди Бајрамов, Асим Бајрамов, Акиф Бајрамов, Ариф Бајрамов, Кәнан Бајрамовун анасы олдуғуну дејир. Султан Илјасова 1948-ҹи ил тәвәллүдлүдүр. Дејир ки, ҝүнүн алтында отуруб сәдәгә гәбул етмәсинә сәбәб нәвәсинин хәстәлијидир. О, 10 ҝүндүр Милли Онколоҝија Мәркәзининин гаршысында бардаш гуруб отурур. Гаршысындан кечән инсанлара һеч нә демир, садәҹә она узадылан гәпикләри ҝөтүрүр.
“Баламын бирини бомба “ҝөјә учуруб”. Бир белә тикәси әлимә ҝәлмәјиб. Онлар шәһид олду, дөвләтдән ҹәми-ҹүмләтаны мәнә 110 манат пул верирләр. Даһа имдад јолум јохдур. Мәнә тикилән евләрдән вермәдиләр, инди дә бу вәзијјәтдәјәм. Аллаһ көмәк олсун!” (она јахынлашыб гәпик верән адама тәшәккүр едир)
С. Илјасова дејир, ағҹијәримдә хәстәлик вар, амма нәвәмин дәрди өз дәрдими унутдурду. Она ҝөрә дә күчәјә чыхыб пул топламаға чалышыр. Амма онун нәвәси үчүн гәпик-гәпик топладығы пул һәр заман әлинә чатмыр. Ики ҝүн өнҹә полисләр башынын үстүн алыб, ону бөлмәјә апарыблар.
“Срағаҝүн ики полис ҝәлди. Дедиләр ки, бурадан дур! Дедим ки, а бала, мән сејид нәслиндәнәм, диләнчи дејиләм. Нәвәм хәстәдир, она ҝөрә бурадајам. Дедиләр ки, дур, јалан данышырсан. Сөјүш сөјдүләр, мәни “дубинка”нын алтына атдылар, дөјдүләр, тәпиклә вурдулар. (белини ҝөстәрир) Бири башымдан тутду, ајагларымдан тутдулар, мәни зорла машына салдылар. Јығылан пулу да вуруб дағытдылар. Мәни ҝөтүрүб Хәтаијә апардылар”.
Шәһид анасы дејир ки, башга ҹүр пул газанмаг шансы јохдур. “Дөвләт көмәк еләмир, президент көмәк еләмир, икинҹи президентимиз көмәк еләмир, бәс мән нејләјим?! Аллаһ да мәнә пул ҝөндәрәси дејил ки?!”.
Султан Илјасованын проблемләри илә бағлы Әмәк вә Әһалинин Сосиал Мүдафиәси Назирлијинин иҹтимаијјәтлә әлагәләр шөбәсинин мүдири Елман Бабајевә едилән зәнҝләримиз ҹавабсыз галыб
