Әһли-Бејт (әлејһимус сәлам) – Бејнәлхалг Хәбәр Аҝентлији- АБНА: Үмүмдүнја Мүсәлманларынын Али Лидери, Силаһлы Гүввәләрин Али Баш Команданы Имам Мүҹтәба Хаменеи Һәзрәтләри Ислам Республикасы Ордусунун 18 апрел – Орду Ҝүнү мүнасибәтилә мүраҹиәтиндә вурғулајыб: Ислам ордусу әввәлки ики мәҹбури мүһарибәдә олдуғу кими, һазырда да аид олдуғу сују, торпағы вә бајрағы ҹәсарәтлә мүдафиә едир.
ИРНА-нын мәлуматына ҝөрә, Али Баш командан Һәзрәт Ајәтуллаһ Сејид Мүҹтәба Һүсејни Хаменеи месажында бүтүн һәрбчиләри, онларын дәјәрли аиләләрини вә бөјүк Иран халгыны Орду Ҝүнү мүнасибәтилә тәбрик едәрәк, Ислам Ингилабынын гәләбәсини ордунун үзәринә дүшмән тәрәфиндән зорла јүкләнмиш зәифлик дөврүнүн сону кими гијмәтләндириб вә сон дөврләрдә вәтәнин мүдафиәси уғрунда ҝөстәрилән шүҹаәтә тохунуб.
Һәмчинин бу месажын бир һиссәсиндә шәһид бөјүк Рәһбәрин доғум илдөнүмү мүнасибәтилә онун ордунун ләғви илә бағлы зәрәрли чағырышлара гаршы чыхмасы вә даһа сонра онун имканларынын артырылмасы истигамәтиндә ҝөстәрдији сәјләрә ишарә олунуб.
Месажын там мәтни ашағыдакы кимидир:
Бисмиллаһир-Рәһманир-Рәһим
“Шүбһәсиз ки, Аллаһ Өз јолунда мөһкәм дивар кими сәф чәкиб дөјүшәнләри севәр! ” (Саф, 4)
Ислам Республикасы Ордусунун јаранмасынын мүбарәк илдөнүмү олан 18 апрел – мәрһум Имам Хомејнинин һикмәтли тәшәббүсү илә бу ад верилмиш ҝүнү – бүтүн һәрбчиләрә, онларын дәјәрли аиләләринә вә бөјүк Иран халгына тәбрик едирәм.
Ислам Ингилабынын гәләбәси ордунун һәјатында ики мәрһәлә арасында сәрһәд хәтти һесаб олунур вә бу, дүшмәнләрин вә дахили хаинләрин бу торпаг вә бу халгын шәрәфли вә садиг ордусуна зорла гәбул етдирдији зәифлик дөврүнүн сону кими гијмәтләндирилмәлидир. Бундан сонра орду өз доғру мөвгејиндә гәрарлашды вә тағут, коррупсијаја уғрамыш Пәһләви режиминә аид олмагдан чыхараг халгын исти гуҹағында јер алды. Һәгигәтән дә орду халгын өвладыдыр вә халгын евләриндән доғур. Гыса мүддәт сонра орду АБШ-нин, Пәһләви режиминин галыгларынын вә парчаланмыш Иран истәјән сепаратчыларын планлары гаршысында дајанараг гәһрәманлыглар ҝөстәрди.
Ислам ордусу бу ҝүн дә әввәлки ики мәҹбури мүһарибәдә олдуғу кими, аид олдуғу сују, торпағы вә бајрағы ҹәсарәтлә мүдафиә едир, илаһи вә халг дәстәјинә архаланараг, сых вә мөһкәм сыраларда, диҝәр силаһлы гүввәләрин мүҹаһидләри илә чијин-чијинә күфр вә тәҹавүзкар ҹәбһәсинин ики ордусу илә үз-үзә дајанараг онларын зәифлијини вә рүсвајчылығыны дүнја иҹтимаијјәтинә нүмајиш етдирир. Неҹә ки, онун пилотсуз учуш апаратлары илдырым кими Америка вә сионист ҹинајәткарларына зәрбәләр ендирир, гәһрәман дәниз гүввәләри дә дүшмәнләрә јени мәғлубијјәтләрин аҹысыны дадыздырмаға һазырдыр.
Диҝәр тәрәфдән, 18 апрел һәм дә јеҝанә дөврүн бөјүк шәһид Рәһбәринин доғум ҝүнүдүр; о шәхс ки, ингилабын илк ониллијиндән етибарән ордунун ләғви илә бағлы зәрәрли чағырышлара гаршы онун горунмасы вә даһа сонра мүхтәлиф саһәләрдә имканларынын артырылмасы үчүн ән чох сәј ҝөстәрмишдир.
Шүбһәсиз, өлкәнин шәргиндән гәрбинә, шималындан ҹәнубуна гәдәр кешијиндә дуран бу көклү халг гурумунун мүхтәлиф имканларынын инкишаф хәтти даһа да ҝүҹләндирилмәли вә Аллаһын изни илә јахын перспективдә бунун реаллашмасы үчүн зәрури тәдбирләр ҝөрүләҹәкдир.
Бу јолда сон беш онилликдә ордуну идарә етмиш вә истигамәтләндирмиш нәсилләрин гәһрәман сималарына диггәт јетирмәк – онларын бир чохунун шәһидләр сырасына гошулдуғуну нәзәрә алараг – силаһлы гүввәләрин бүтүн бөлмәләри үчүн ибрәт вә илһам мәнбәјидир. Гәрәни, Фәллаһи, Намҹу, Фәкури, Бабаји, Сәттари, Әрдистани вә Сәјјад Ширази кими шәхсијјәтләрдән тутмуш сон шәһидләр Сејид Әбдүррәһим Мусәви вә Әзиз Нәсирзадәјәдәк.
Уҹа Аллаһын саламы вә рәһмәти Иран Ислам Республикасы Ордусунун бүтүн мүҹаһидләринә – онун ҝенераллары вә командирләриндән тутмуш сәссиз вә адсыз әсҝәрләринә гәдәр – олсун. Һәмчинин онун бүтүн фәдакарларына вә газиләринә салам олсун вә Америка вә сионист режимин Иран халгына гаршы апардығы мәҹбури мүһарибәнин бүтүн шәһидләринин һөрмәтли аиләләринә хүсуси илаһи рәһмәт диләјирәм.
Вәссәламу әлејкум вә рәһмәтуллаһи вә бәрәкатуһ.
Sizin rəyiniz