Јанварын 27-дә Азәрбајҹан Республикасынын Теһрандакы сәфирлијинә шәхси зәминдә баш вермиш һүҹумдан дәрһал сонра Иран тәрәфи адекват тәдбир ҝөрсә дә, гәрәзли даирәләр мәсәләни көрүкләмәклә мәшғулдурлар.
Иранын ХИН рәһбәри Һүсејн Әмир-Абдуллаһијан һадисәдән сонра бу өлкә сәфиринин мүшајиәти илә Тәҹриш Шәһидләри хәстәханасында сәфирлијин ики јаралы ишчисинә баш чәкиб.
Әмир-Абдуллаһијан хәстәханада кечирилән мәтбуат конфрансында дејиб ки, Иранын кәшфијјат вә тәһлүкәсизлик органларынын мәлуматына ҝөрә, Азәрбајҹанын Теһрандакы сәфирлијинә гаршы силаһлы аксија террорчу вә мүтәшәккил әмәлијјат дејил вә шәхси мотивлә һәјата кечирилиб.
Онун сөзләринә ҝөрә, президент Рәиси илк анда бу һадисәнин гануни вә мәһкәмә јолу илә арашдырылмасы, бу мәсәләдә сәһләнкарлыға јол вермиш ола билән шәхсләрин ҹинајәт мәсулијјәтинә ҹәлб едилмәси барәдә ҹидди ҝөстәриш вериб.
Сүбутлар ҝөстәрир ки, Азәрбајҹан сәфирлијинә һүҹумун сәбәби бирмәналы олараг шәхси мотив олуб, она ҝөрә дә Азәрбајҹан Республикасынын бу һүҹуму террор акты адландырмасы емосионал вә тәләсик һәрәкәт кими дәјәрләндирилир.
Диҝәр тәрәфдән сионист режим сәфиринин бу һадисәдән суи-истифадә едәрәк Азәрбајҹан президентинин көмәкчиси Һикмәт Һаҹыјевлә ҝөрүшү ондан хәбәр верир ки, үчүнҹү гүввәләр ортаја атылараг – неҹә дејәрләр - лил судан балыг тутмаг истәјирләр. Ајдын мәсәләдир ки, сионистләрин вә бир сыра Гәрб медиаларынын гаршыја гојдуглары мәгсәд ики өлкә арасында мүнасибәтләри позмаг вә Иран Ислам Республикасынын гоншулары, о ҹүмләдән Азәрбајҹан Республикасы илә әлагәләри инкишаф етдирмәк сијасәтини шүбһә алтына алмагдан башга бир шеј дејил.
Даһа гәрибәси одур ки, рәсми Теһранын мүнасибәтләрдә өзүндән кифајәт гәдәр сәдагәт ҝөстәрдији һалда Илһам Әлијев һөкумәти Исраилдә сәфирлик ачмаг әрәфәсиндә Теһрандакы сәфирлијин бағланмасынын месажыны верир вә долајысы илә сионистләрин тәлиматына ујғун давраныр. Бу, шүбһәсиз ки, һакимијјәтин ачыгламаларында инҹә мәгамдыр!
Онлар иддиа едирләр ки, Иранда ҝуја анти-Азәрбајҹан кампанијасынын ҹәрәјан етмәси гоншу өлкәјә гаршы һәрәкәтләрә јол ачыб. Һалбуки, Иранда һеч бир анти-Азәрбајҹан кампанијасы ҝетмир, садәҹә оларг експертләр Аразын о тајында баш верән анти-Иран һәрәкәтләрини тәнгид едирләр. Бу реаллығы нәзәрә алмадан киминсә дәстәјинә архаланыб Иран Ислам Республикасы илә дүшмәнчилик етмәк Әлијев режиминин хејринә дејил. Һөрүмчәк торундан даһа зәиф олан екстремист Нетанјаһуја бел бағлајыб гоншу дөвләти шәрләмәк Әлијевин ҝәләҹәји үчүн јахшы һеч нә вәд етмир. О, халгынын мәнафејини дүшүнүб Иранла мүнасибәтләрин инкишафында мараглы олмалы вә онун гырмызы хәттини кечмәмәли олдуғуну дәрк етмәлидир.