Әһли-Бејт (ә) Хәбәр Аҝентлији

мәнбә : ABNA24
cümə

27 yanvar 2023

20:19:14
1341520

Иранын Бакыдакы сәфири ХИН-ә чағырылыб

Бу ҝүн Иран Ислам Республикасынын Азәрбајҹан Республикасындакы сәфири Сејид Аббас Мусәви Азәрбајҹан Республикасынын Иран Ислам Республикасындакы Сәфирлијинә гаршы террор һүҹуму илә әлагәдар олараг Азәрбајҹан Республикасы Хариҹи Ишләр Назирлијинә чағырылыб.

Азәрбајҹан Республикасы ХИН-ин вердији мәлумата ҝөрә, ҝөрүшдә Азәрбајҹанын Теһрандакы Сәфирлијинә гаршы төрәдилмиш силаһлы басгын гынаныб вә “Дипломатик Мүнасибәтләр һаггында Вјана Конвенсијасы”ндан ирәли ҝәләрәк дипломатик нүмајәндәликләрин тәһлүкәсизлијинин тәмин едилмәли олдуғу вурғуланыб.

Ҝөрүшдә һәмчинин, Иранын сәлаһијјәтли гурумлары тәрәфиндән силаһлы һүҹуму төрәдән шәхсин тезликлә мәсулијјәтә ҹәлб олунмасы, һүҹумун һәртәрәфли арашдырылмасы, ҹинајәтин тәшкили вә төрәдилмәсиндә еһтимал үзрә әли олан диҝәр иштиракчыларын мүәјјәнләшдирилмәси вә ҹәзаландырылмасы тәләб олунуб.

Ҝөрүшдә Иран сәфири Сејид Аббас Мусәви Азәрбајҹан сәфирлијинә гаршы баш верән силаһлы һүҹуму кәскин шәкилдә писләјәрәк баш верәнләрдән дәрин кәдәр һисси кечирдијини, сәфирлик әмәкдашынын аиләсинә, еләҹә дә Азәрбајҹан һөкумәтинә вә халгына дәрин һүзнлә башсағлығы вердијини билдириб.

Сәфир ҝөрүшдә һабелә Иранын аидијјәти сәлаһијјәтли гурумлары тәрәфиндән дәрһал һадисәјә реаксија верилдијини, һазырда исә аидијјәти һүгуг-мүһафизә органлары тәрәфиндән мәсәләнин арашдырылдығы, әтрафлы мәлуматын истинтаг просеси баша чатдыгдан сонра иҹтимаијјәтә ачыгланаҹағыны вурғулајыб.

342/