Мүсәлман Бирлији Һәрәкатынын сәдри, илаһијјатчы Талеһ Бағырзадә һаггында һөкмдә она верилмиш 20 иллик һәбс ҹәзасынын илк 7 илинин һәбсхана режиминдә чәкилмәси нәзәрдә тутулмушду. Нојабрын 26-да илаһијјатчыја верилмиш 7 иллик һәбсхана режиминин мүддәти баша чатдығына ҝөрә орадан чыхарылыб вә 12 сајлы ҹидди режимли ҹәзачәкмә мүәссисәсинә көчүрүлүб. Мәһбусун һәјат јолдашы билдириб ки, ҹәзачәкмә мүәссисәсинә дахил олдуғу андан да тәзјигләр башлајыб. Мүәссисәнин рәис мүавини ону тәһгир едиб. О да аҹлыг аксијасына әл атыб.
“Мүдафиә хәтти” инсан һаглары тәшкилатынын иҹрачы директору Рүфәт Сәфәров да илаһијјатчынын 12 сајлы ҹәзачәкмә мүәссисәсинә дахил олан кими тәһгир вә ишҝәнҹәјә мәруз галмасы һагда мәлумат алдыгларыны дејиб.
Бу арада МБҺ бәјанат јајараг, баш верәнләри тәхрибат адландырыб. Хатырладаг ки, 2015-ҹи илдә Нардаран гәсәбәсинә гаршы апарылан әмәлијјат нәтиҹәсиндә Талеһ Бағырзадә дә дахил олмагла, 100-ә јахын адам һәбс олунмушду. Онлардан 42 нәфәринә дөвләт чеврилишинә ҹәһд вә террорчулуг кими ағыр иттиһамлар ирәли сүрүлмүш вә 13 илдән 20 илә гәдәр азадлыгдан мәһрум едилмишдиләр. Диҝәрләринә исә 5-6 илә гәдәр һәбс ҹәзасы верилмишди.
Сонрадан заман-заман Мүсәлман Бирлији Һәрәкатынын бир сыра үзвләри наркотик вә с. иттиһамларла һәбс олунуб. Һазырда һәрәкатын сәдри Талеһ Бағырзадә дә дахил олмагла, тәшкилатын бир сыра фәаллары һәбсдәдир. Лакин Талеһ Бағырзадә вә диҝәр инанҹлы фәаллар иттиһамларын сахта олдуғуну, һөкумәтин сијасәтини тәнгид етдикләринә ҝөрә шәрләнәрәк ҹәзаландырылдыгларыны бәјан едирләр.
342/