Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Ермәнистанын Азәрбајҹанла һәрби мүнагишәјә мүдахилә етмәк чағырышына Коллектив Тәһлүкәсизлик Мүгавиләси Тәшкилатынын сөнүк реаксијасы рәсми Ирәванын кәскин тәнгидинә сәбәб олуб.
Туран Хәбәр Аҝентлијинин тәһлилиндә дејилир ки, әҝәр әввәлләр бу тәнгид експертләрдән вә Гәрбпәрәст сијасәтчиләрдән ҝәлирдисә, инди өлкәнин биринҹи шәхсләри наразылыг едирләр. Белә ки, парламентин спикери Ален Симонјан дејиб: “Бизим ҝөзләнтиләримиз өзүнү доғрултмур. Коллектив Тәһлүкәсизлик Мүгавиләси Тәшкилатынын нијә лазыми тәдбирләри ҝөрмәдијини халга изаһ етмәк бизим үчүн чәтин олаҹаг. Тәбии ки, биз нәтиҹә чыхардыг”.
Симонјан хатырладыб ки, Ермәнистанла Русија арасында достлуг вә гаршылыглы јардым һаггында сазиш вар вә онун сөзләринә ҝөрә, ермәни тәрәфи Москвадан даһа нәзәрәчарпаҹаг һәрәкәтләр ҝөзләјир, бәјанатлар јох.
О һәмчинин Русија иҹтимаи телеканалларынын ефириндә Ермәнистан һакимијјәтинин үнванына “тәхрибатчы” бәјанатлардан һиддәтләндијини билдириб.
Өз нөвбәсиндә, Ермәнистан Тәһлүкәсизлик Шурасынын рәһбәри Армен Григорјан даһа конкрет шәкилдә билдириб ки, “Ирәванын Коллектив Тәһлүкәсизлик Мүгавиләси Тәшкилатындан тәләби Азәрбајҹан гошунларынын Ермәнистан әразисиндән чыхарылмасына һәрби-сијаси јардым ҝөстәрилмәси иди, лакин бу, индијәдәк јеринә јетирилмәјиб. КТМТ-нин индијәдәк лазыми реаксија вермәмәси ҝөзләнтиләримизин өзүнү доғрултмадығы анламына ҝәлир”, - дејә о вурғулајыб.
Диггәт: Хәбәрдән Истифадә Етдикдә Мәнбәјә Истинад Лазымдыр!