Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, "Мартын 24-дә Әдлијјә Назирлијинин Сәһијјә Хидмәтиндә чалышан бир нечә һәким Илгар Мәммәдовун јанында олуб. Хәстәлији илә бағлы мүајинәләр апарыблар".
Буну АзадлыгРадиосуна РЕАЛ Һәрәкатынын иҹра катиби Натиг Ҹәфәрли билдириб.
Н.Ҹәфәрли дејиб ки, мүајинә заманы И.Мәммәдовда остеохондроз – фәгәрә сүтуну хәстәлији ашкарланыб: "Биздә олан мәлумата ҝөрә, Әдлијјә Назирлијиндән ҝәлән һәкимләр бу һагда И.Мәммәдовун ҹәза чәкдији мүәссисәнин рәһбәрлијинә дә мәлумат вериб".
Н.Ҹәфәрлинин демәсинә ҝөрә, Әдлијјә Назирлијиндә ҝәлән һәкимләр И.Мәммәдовун јатаг шәраитинин јахшылашдырылмасына еһтијаҹ олдуғуну дејиб: "Бәрк јатаг дәсти олмалыдыр ки, ән азы ағрыларын дәрәҹәсини азалда билсин. Биздә олан хәбәрләрә ҝөрә, ҹәзачәкмә мүәссисәсинин рәһбәрлији бу шәраити јахшылашдыраҹағына сөз вериб".
Иҹра катиби билдириб ки, мартын 25-дә И.Мәммәдовун аилә үзвләри онунла ҝөрүшүб. Лазым олан дәрманлар апарылыб, истифадә едилиб, сәһһәтиндә нисби јахшылашма вар: "Амма бунунла белә, Гырмызы Хач Комитәсинин хәтти илә хариҹи тибби мүтәхәссисин И.Мәммәдову мүајинә етмәсини диггәтдә сахлајырыг. Бу һагда Комитәјә мүраҹиәт едилиб вә үмид едирик ки, бу һәфтәнин сону бу мәсәлә дә һәллини тапаҹаг".
Пенитенсиар Хидмәтин (ПХ) мәтбуат хидмәтинин рәһбәри Меһман Садыгов исә И.Мәммәдовун мүајинәсинә хариҹи мүтәхәссисин ҹәлб едилмәси илә бағлы истәјини белә шәрһ едиб: "Мәһкумлар тәкҹә Пенитенсиар Хидмәтдә фәалијјәт ҝөстәрән һәкимләрин јох, һәмчинин истәдикләри мүтәхәссисләрин мүајинәсиндән кечә биләр. Јәни, Пенитенсиар Хидмәтин һәкимләринин нәзарәти илә өз һесабына мүалиҹә едилә биләр, бу, ганунвериҹилијин тәләбидир".
Илгар Мәммәдов өтән һәфтә аиләсинә зәнҝ вурараг сәһһәтинин ағырлашдығыны билдирмишди. О, хариҹи һәкимләрин мүајинәсиндән кечмәк истәдијини дә аилә үзвләринә чатдырмышды. Бундан сонра РЕАЛ Һәрәкаты И.Мәммәдовун бу истәји илә бағлы бир сыра бејнәлхалг тәшкилата мүраҹиәт етмишди.
ХАТЫРЛАТМА
РЕАЛ Һәрәкатынын лидери Илгар Мәммәдов 2013-ҹү илин јанварында Исмајыллыда күтләви иғтишашларын тәшкилиндә иттиһам олунараг, 7 ил азадлыгдан мәһрум едилиб.
Авропа Инсан Һүгуглары Мәһкәмәси 2014-ҹү илин мајында И.Мәммәдовун азадлыг һүгугу вә тәгсирсизлик презумпсијасынын позулмасыны таныјыб.
Авропа Инсан Һүгуглары Мәһкәмәсинин гәрарындан сонра онун иши Шәки Апеллјасија Мәһкәмәсинә ҝөндәрилиб. Өтән ил апрелин 29-да Шәки Апеллјасија Мәһкәмәси биринҹи инстансија мәһкәмәсинин һөкмүнү гүввәдә сахлајыб. Бундан сонра мүдафиә тәрәфи Шәки Апеллјасија Мәһкәмәсинин гәрарындан Али Мәһкәмәјә кассасија шикајәти вериб. Али Мәһкәмә нојабрын 18-дә кассасија шикајәтини тәмин етмәјиб.
Авропа Шурасы Назирләр Комитәси 2016-ҹи ил сентјабрын 20-дә кечирилән иҹласында И.Мәммәдовун азадлыға бурахылмамасы илә Авропа Инсан Һүгуг вә Азадлыглары Конвенсијасынын позулдуғуну ачыглајыб.
Диггәт: Хәбәрдән истифадә етдикдә мәнбәјә истинад лазымдыр
