Әһли-Бејт
(әлејһимус сәлам) – Хәбәр Аҝентлији АБНА-нын вердији мәлумата әсасән, Һүсејн Әмир
Абдуллаһиан вә Фејсәл бин Фәрһан Ал Сәуд Пекиндә бир араја ҝәлибләр.
Ҝөрүш заманы Иран вә Сәудијјә Әрәбистанынын хариҹи ишләр назирләри мүәјјәнләшдирилмиш вахтда сәфирликләрини вә консуллугларыны јенидән ачмаг барәдә разылыға ҝәлибләр.
Бу барәдә Иран Ислам Республикасы вә Сәудијјә Әрәбистаны ХИН башчыларынын бирҝә бәјанатында гејд олунуб.
Бәјанатда билдирилиб ки, данышыглар заманы һәр ики тәрәф Пекин Сазишинин иҹрасыны вә онун гаршылыглы инам вә әмәкдашлығы ҝенишләндирән, реҝионда тәһлүкәсизлик, сабитлик вә рифаһын јарадылмасына көмәк едәҹәк шәкилдә активләшдирилмәсинин ваҹиблијини вурғулајыблар.
Бирҝә бәјанатда о да гејд олунуб ки, һәр ики өлкәнин ХИН башчылары икитәрәфли әлагәләрин ҝенишләндирилмәси вә ики өлкә арасында 2001-ҹи илдә имзаланмыш тәһлүкәсизлик саһәсиндә әмәкдашлыг сазишинин вә 1998-ҹи илдә имзаланмыш игтисадијјат, тиҹарәт, инвестисија, технолоҝија, елм, мәдәнијјәт, идман вә ҝәнҹлик саһәләриндә үмуми әмәкдашлыг сазишинин активләшдирилмәсини вурғулајыблар.
Тәрәфләр разылашдырылмыш мүддәт әрзиндә ики өлкәнин сәфирликләринин јенидән ачылмасы вә Әр-Ријад вә Теһранда ики өлкәнин сәфирликләринин, Ҹиддә вә Мәшһәддә бу ики өлкәләрин консуллугларынын ачылмасы үчүн лазыми тәдбирләрин ҝөрүлмәси барәдә разылыға ҝәлибләр.
Тәрәфләр ики өлкә арасында әмәкдашлығын ҝенишләндирилмәси јолларыны арашдырмаг үчүн техники нүмајәндә һејәтләри арасында лазыми координасијаны давам етдирмәк, һәмчинин рәсми нүмајәндә һејәтләринин вә өзәл секторун учушларынын вә гаршылыглы сәфәрләринин бәрпасы, ики өлкә үчүн визаларын ејни заманда Үмрә визаларынын верилмәсини асанлашдырмаг барәдә разылашыблар.
Бирҝә бәјанатда билдирилиб ки, тәрәфләр ики өлкә арасында әмәкдашлығын ҝенишләндирилмәси гаршысында дуран бүтүн манеәләри арадан галдырмаға һазырдырлар вә реҝионун тәһлүкәсизлијини вә сабитлијини тәмин едә биләҹәк, онун халгларынын вә өлкәләринин марагларына ујғун истәнилән саһәдә әмәкдашлығы ҝенишләндирмәк барәдә разылашырлар.
Сәудијјә Әрәбистанынын хариҹи ишләр назири Әмир Фејсәл бин Фәрһан Әл Сәуд иранлы һәмкары Һүсејн Әмир Абдуллаһианы Сәудијјә Әрәбистанына сәфәр етмәк вә Әр-Ријадда икитәрәфли ҝөрүш кечирмәјә дәвәт едиб.
Әмир Абдуллаһиан бу дәвәти мүсбәт гаршылајыб вә өз нөвбәсиндә һәмкарыны Ирана сәфәрә вә Теһранда икитәрәфли ҝөрүш кечирмәјә дәвәт едиб. Сәудијјә Әрәбистанынын хариҹи ишләр назири дәвәти гәбул едиб.
Гејд едәк ки, бирҝә бәјанатын имзаланмасы мәрасиминдә Чин хариҹи ишләр назири Гин Ҝанҝ да иштирак едиб.
Диггәт: Хәбәрдән Истифадә Етдикдә Мәнбәјә Истинад Лазымдыр!
